Aprové le Plann Clima dl Comun da Corvara

Le Comun resiliënt al clima

Le Comun da Corvara tol sö le Plann Clima

Tl insciödit Team Clima y Energia, rapresentanc dl Comun da Corvara, stakeholder y zitadins á lauré apresciapüch dui agn sön sciöche le Comun da Corvara pois deventé neutral dal punt de odüda climatich y limité les conseguënzes dl mudamënt climatich. 

Düc i Comuns dla Val de Puster á zirca dan da dui agn tut la dezijiun de lauré fora Planns Clima tl cheder dl’iniziativa “Regiun.Clima.Energia Val de Puster” (KER). Ti laurs revardënc ési gnüs daidá dala Comunité Comprensoriala y dal Regional Management GAL Val de Puster. Le resultat final é n obietif ambizius: ester neutrai dal punt de odüda climatich anter le 2040 y mët a jí mosüres adeguades por fá frunt ales conseguënzes dl mudamënt climatich. 

“Le team clima y energia á analisé la situaziun atuala y á valuté avisa ci mosöres che i podun adoté tl Comun da Corvara. Le Plann Clima n’é porchël nia n produt standard, mo al é personalisé por nosc Comun”, dij le responsabl dl team clima dl Comun Stefan Costa. Irene Unterkofler dl Regional Management GAL Val de Puster á dé n sostëgn tratan düt le prozes de elaboraziun y é positiva sön i resultac. “I Planns Clima é n stromënt dinamich che dëida i Comuns da smendrí le consum energetich, da adoré l’energia te na manira plü efiziënta, da adoré deplü fontanes de energia renovables y da se adaté ales conseguënzes dl mudamënt climatich”, dij Unterkofler. 

Le Plann d'aziun – le “cör” dl Plann Clima

I frabicac publics, i implanc y le parch veicui é gnüs ejaminá avisa dal team clima y energia. Ciünes é pa les emijiuns de C02 gaujades? Tan de eletrizité, gasöre o öre de scialdamënt él pa debojëgn? Te ci mosöra pó pa le consum energetich gní curí dales energies renovables? Chëstes y d’atres domandes á metü adöm la basa dl insciödit “Plann d’aziun”, le “cör” dl Plann clima. 

Por passé dala reflesciun deboriada al'aziun, él ince gnü fat fora ci mosöres che an mëss mëte a jí anter can y chi che é responsabl. Chësc é particolarmënter important y de ütl por les ativités che vëgn do y por le monitoraje. 

Plann clima aprové dala Junta comunala

Do na discusciun dër monüda tla Junta  comunala dl Comun da Corvara, é le Plann Clima gnü aprové cun dütes les usc a öna. 

I prüms proiec concrec tl Comun da Corvara é gnüs metüs da jí o é bele tla fasa de atuaziun. Danter chisc él chëstes operes:

- ampliamënt y restrotoraziun dl frabicat dla scolina aladô dl criter DNSH dl PNRR, o ince tl respet dl prinzip da ne fá nia dann significatif al obietif de ‘limitaziun dles mudaziuns climatiches’ (adoziun de tecnologies dl ambiënt al’avanguardia y adoranza y sfrutamënt de fontanes de energia renovables)

- renovamënt gradual dla rëi dl’iluminaziun publica por la limitaziun di consums, di cosc y dl pëis ambiental tres introduziun dla tecnologia LED

- sostëgn a proiec scolastics finalisá ala sensibilisaziun y promoziun dla cosciënza por na mobilité che vá da sostigní.

Cun l’aiüt de workshop y inrescides unse porvé da mëte adüm le plü ch’ara vá i consëis de nüsc zitadins y de ne “ciaré nia dlungia ia”. Sperun de avëi dé n contribut significatif, nia ma por le clima, mo ince por la comunité”, dij l’Ombolt Rottonara Robert.

Le plann por le clima de nosc comun pó gní desciarié chiló.

Plann Clima dl Comun de Corvara - aprové (1,76 MB) - .PDF

27/02/2025